Мекеме жаңалықтары
Театр тарландарына тағзым
І.Омаров атындағы Қостанай облыстық қазақ драма театры халықаралық театр күнін көңілді де мазмұнды концерттік бағдарламамен атап өтті. Театр актерлерінің сегіз қырлы, бір сырлы, таланттар екенін мерекелік концерт те байқатты. Мерекелік концертте олар ән де айтты, би де биледі, көрермендерді қыран-топан күлкіге кенелткен әзіл-оспақ өз алдына.
Мерекелік салтанатта Облыстық мәдениет басқармасының басшысы Құралбек Атамұратов театр ұжымын төл мерекемен құттықтап, өнерде өрлей беруіне тілек білдірді. Сонымен қатар театр басшысы Азамат Чукеевке облыс әкімі Құмар Ақсақаловтың Алғыс хатын табыс етті. Мерекеде театр ұжымының әртістері мен техникалық қызметкерлері театрдың «Темірқазық–2024» сыйлығымен марапатталды. Оның арасында «Ең үздік әйел бейнесі» аталымы Зәмзәгүл Бегайдароваға, «Ең үздік ер адам бейнесі» Қуаныш Маратұлына тапсырылды. Театр әртістері Қазақстан театрлар одағының марапаттарына да ие болды. «Дара» медалі театр актрисасы Аида Супатаеваға бұйырды.
